Бародар ва ҳамсафи гиромӣ, Раҳматҷони Маҳмадҷон, Худованди пок ёру мададгорат бошад!
Имрӯз, дар ин рӯзи хос ва муҳиме, ки зодрӯзи шумост, аз номи ҳамаи аъзоён ва тарафдорони Ҳаракати сиёсии “Гурӯҳи-24” мехоҳем шуморо бо самимияти комил табрик намоем. Шумо на танҳо як узви фаоли ҳаракати мо, балки як намунаи ҷасорат ва устуворӣ дар рӯ ба рӯи зулму истибдод ҳастед!
Дар ин рӯз, мо наметавонем ончунон, ки мехоҳем ҷашн бигирем, зеро шумо дар паси панҷара қарор доред. Аммо, бояд бигӯем, ки ҳар яке аз мо бо шумо ҳастем ва бо дилҳои пур аз меҳр ва эҳтиром шуморо ёд мекунем. Муборизаи шумо барои адолат, озодӣ ва ҳуқуқи инсон дар Тоҷикистон, барои ҳамаи мо рӯҳбаландкунанда ва намунаи ибрат аст.
Ҳарчанд, ки режими Раҳмонов кӯшиш мекунад, ки бо зӯроварӣ ва ғайриқонунӣ садои ҳақиқат ва муборизони роҳи озодиро хомӯш кунад, аммо ҳамеша медонед, ки ҳақиқат пирӯз хоҳад шуд. Шумо, бо истодагарии худ дар баробари ин ноадолатиҳо, нишон додед, ки чӣ гуна метавон бо далерӣ ва бо садоқат ба арзишҳои волои инсонӣ ва ватандӯстӣ устувор буд.
Дар ин рӯзи зодрӯзи шумо, мо бо якдилӣ дуо мекунем, ки адолат барқарор гардад ва шумо ҳарчи зудтар озод шавед. Мо бо тамоми нерӯ ва имконоти худ талош мекунем, то садои шумо ва ҳамаи онҳое, ки беасос маҳкум шудаанд, ба ҷаҳониён расад ва ин зулм ба поён расад.
Раҳматҷони азиз, бигзор рӯзе фаро расад, ки шумо бо озодӣ дар назди оилаи худ бошед ва дар фазои озоду мардумсолорӣ Тоҷикистон ҳаёти хушбахтона дошта бошед.
Ҳамеша бо шумо ва дар фикратон ҳастем!
Ҳаракати сиёсии “Гурӯҳи-24”.
